احنا سته نجمة دايرة
وامى عينها بينا دايرة
ترعى سته
حايرة بينا فى الدواير
احنا ستة زى لولى
وامى ربطانا بخيطانها
والقلب يبرد لما نرجع للسراير
لفة تحرس الملايكة
حوالينا تسعى
من شقاوتنا الكتيرة
واما تصرخ من العمايل والجراير
نجرى منها وهى تجرى
مرة تضرب مرة تحضن
مرة تدعى خايفة من سؤ المصاير
امى ربتنا عزاز
عارفة ان احنا قزاز
وأحيانا نبقى لذاذ
حايمة بينا تحمى روحنا م المخاطر
امى خلتنا حبايب
فى المذاكرة
فى الحياة
وفى المصايب
حتى سته ف ضرب سته بالمساطر
امى حضنتنا كتير
وكل واحد خد من امه شيئ كتير
رغم ستة عدد كبير
كل واحد كان بسته
عنده ألف من العناصر
اللى ثاير واللى هادى
واللى ضاحك واللى باكى
واللى رايق واللى شاكى
روحها دنيا م المشاعر
تحتوينا مهما كنا
تحس بينا من عيونا
عارفة فى قلوبنا اللى صاير
احنا سته وامى مشيت
بس لسه هى بينا
هى سكة ليها نرجع
مهما تهنا ف الدواير
 |
| امى رحمها الله لا تنسوها من دعائكم |
إرسال تعليق