 |
| الأكل فواكه مش حلويات |
ازاى ممكن تخس ببساطة
من كتر الاعلانات بتاعت لو راجل كل اللى بتيجى فى جميع القنوات اكتر من الافلام والمسلسلات زهقت
كمان الكلام الكتير عن وصفات التخسيس ومحدش بيخس وأدوية التخسيس والزهق اللى الناس بقت فيه
قلت اتفلسف واديكم شوية افكار مبتكرة بتفكير لسه خارجة من المطبخ حالا وضارب شوية فتة عدس كهرمان بس السؤال المهم اللى لازم نجاوبه الاول ليه عاوزين نخس ...... انا عن نفسى تخين وشايف ان الناس اللى عاوزه تخس مش بتخس لانهم مش فاهمين انهم تخنوا على مر السنين يعنى مش فجأه ولما بيحاولوا يخسوا بيبقوا عاوزين الساحر أووز يهز بعصايته السحرية هوب نبقى رفيعين بصوا زى ما تخنا على مر السنين ايه رأيكم نخس على مر الشهورعشان نبقى منطقين مع نفسنا وايجابيين .
بس من وجهة نظرى المبعديه فى ظل الظروف الاقتصادية انك تحافظ على كرشك عشان هينفعك لو الدنيا غمقت لان الكرش ده عبارة عن ايه خلايا دهنية يعنى هيشيلك وكمان بيعمل اتزان على الارض والأهم كمان انك بتبقى صعب الاحتواء لان الكرش بمثابة حائط صد هلامى فمفيش دراعات هتلف حواليك بسهولة وبتشغل حيز من الفراغ لا يستهان بيه حاجة كدا تملى العين فهتضرب قليل فى حياتك .
اما بقى لو مصمم تخس ↞↞↞ اتجوز 😂😂😂😂😂😂😂😂😂😂 ايوه اتجوز واحدة تنكد عليك فهتخس او واحدة طبيخها وحش فلا هتقدر تجيب درليفرى ولا تقدر تعترف ان الاكل وحش وكده ممكن منشوفكش اساسا من الخساسان او هتموت مسموم وبالنسبة للستات اتجوزى واحد بخيل هتختفى مش هتخسى واوعى تتجوزى راجل نكدى لان الستات لما تتقريف وحد ينكد عليها بتاكل بافترى
طيب لو اتجوزتوا وسعداء فى حياتكم يبقى ( اطلق لدهونك وكرشك العنان ) ويا سلام لو نفسها حلو فى الأكل لأن خبراء التغذية بيقولوا ان الاستقرارالنفسى والعاطفى من اكبر عوامل زيادة الوزن وكمان الحمل والولادة بيخلوا الست تتحول لكائن مستدير وكمان لبس الجزم بالكعب العالى اكتر من 5 سم بيخلى الجسم مرتكز على مقدمة القدم وبيبقى الجسم مشدود من الخلف هوب البطن للأمام وتكبر حجم الأرداف وخصوصا ان الست معدلات الحرق عندها نص معدلات الحرق عند الراجل
ازاى بقى نخس من غير ما نحس هنعمل حاجات بنعملها فى يومنا الطبيعيى بس هنعملها بشكل مختلف شوية :
- اول ما نصحى الصبح نشرب ميه كتير على قد ما نقدر حتى ولو بصورة متقطعة وكمان المية خلال اليوم متقلش عن 2 ليتر وكل ما نسبة الميه هتزيد هنلاقى الشهية للاكل بتقل ويزيد الحرق
- نقلل السموم البيضا ( الملح - والسكر ) لأن الملح بيحبس السوائل فى الجسم والسكر بيزود السعرات الحرارية وممكن نعمل ده تدريجى باستخدام العسل بديل السكر وكمان هناخد فوايد العسل
- نبعد عن الزيوت المهدرجة والدهون المشبعة والاكلات المقلية ونحاول نعتمد على الاكل المسلوق الصحى ونستخدم زيت الذرة
- نفطر كويس نتغدى كويس ناكل طول اليوم مش مهم بس متكلوش وتناموا ابدا لو كلنا بالليل يبقى لازم وقت بين الاكل والنوم ولازم مجهود حركى يعنى ممكن نتمشى شوية ( نظام اتعشى واتمشى )
- نبعد عن التوتر والقلق عشان بيسبب افراز هرمون فاسويرسين لأنه بيؤدى لتعطيل إدرار السوائل فى الجسم مفيش حاجة تستاهل
- الوقوف والجلوس بشكل صحيح يعنى الوقوف يكون الضهر مفرود والصدر مشدود
- 2 كوباية ليمون من غير سكر واحدة الصبح وواحدة بالليل
- ممارسة المشى ولو نص ساعة يوميا
- ناكل فاكهة ومنكلش حلويات ناكل خضار ونبعد عن الخضار اللى بيسبب الانتفاخ
 |
| الخضروات والفواكه افضل من الوجبات السريعة المشبعة بالدهون |
إرسال تعليق